Rankont yon komisyon bipati CEP-Primati sou chanjman pou fè nan dekrè elektoral 2 jen 2026 la

Yon nòt laprès CEP a ki rapòte yon seri rankont travay ki te fèt ant 11 ak 23 jen 2026 pa yon Komisyon bipatit ki gen twa manm Konsèy la ak reprezantan Primati a, sou chanjman pou fè nan Dekrè elektoral 2 jen 2026 la. Konsèy la di sou kisa chanjman sa yo pote: kèk dispozisyon ki gen rapò ak endepandans Enstitisyon elektoral la ak lòt eleman ki ka kontrarye bon dewoulman pwosesis elektoral ki an kou a. Plizyè reprezantan pati politik, ke Primati a te envite, te patisipe tou nan echanj yo. Anmenmtan, Konsèy la siyale ke plizyè seyans travay te òganize pandan semèn 15 rive 19 jen 2026 la ant reprezantan CEP ak Ministè Ekonomi ak Finans sou bidjè operasyon elektoral yo, epi li gen pwojè òganize nan pi bon delè sesyon echanj ak pati politik ak sosyete sivil la sou pwosesis elektoral la. Se negosyasyon sa a ki te bay dekrè modifikatif 2 jiyè 2026 la, epi lè w li de yo ansanm ou wè kilès nan objeksyon Konsèy la ki te satisfè: dekrè sa a te abwoje atik 14.5 ak pwen 3 atik 14.8, de dispozisyon ki touche libète aksyon konsèy administrasyon CEP a.