Rapò ankèt sou ekspedisyon pinitif ajan BOID nan Lilavwa

Rapò a kòmanse ak sa ki te pase anvan. 30 septanm 2017, moun Lilavwa, yon katye Kwadèboukè, t ap fete fèt patwonal Sent Terèz lè ajan BOID entèveni, yo fouye tout moun ki te la epi yo raze cheve tres yon nonm yo te pran pou bandi, ki di, dapre moun zòn nan, chak tres ap ranplase pa tèt yon ajan BOID. 12 oktòb, yon ajan inite sa a mouri anba bal nan Lilavwa 39, moun ame sou moto tire l, epi ajan menm inite a fè yon desant nan zòn nan. Rezo a rankontre otorite polisye, fanmi polisye ki mouri a, viktim ekspedisyon an ak moun zòn nan. Bilan li note a, pou yon ajan yo touye, se yon moun yo egzekite apre yo te arete l, de lòt ki disparèt apre arestasyon yo, omwen uit moun ki pran baton ladan yo yon tigason senkan, nèf moun arete, twa kay ak de anga ki t ap sèvi kòm boutik pou lokatè yo boule, de lòt kay sakaje, yon machin ak yon moto boule epi yon lòt machin vandalize.

Agiman rezo a bay polis la se ke se pa ak operasyon pinitif avèg li pral rezoud pwoblèm nan, men nan respekte enstitisyon polisye a epi bay egzanp lè li swiv règ etabli yo, kote tout moun ki vyole lalwa swiv, arete epi mennen devan yon otorite jijman. Li mande otorite polisye yo fè limyè sou asasina ajan an, arete epi mennen devan lajistis kriminèl ki enplike yo, fè ankèt sou asasina ann seri polisye yo, elabore ak ekspè yon plan sekirite pou polisye yo, epi fè ankèt sou ekspedisyon pinitif la epi sanksyone ak dènye rigè ajan ki te patisipe yo.