Mizajou mesaj kle : Eskalad ensekirite nan Pòtoprens ak Latibonit ap degrade manje ak revni menaj yo

Mizajou mesaj kle sa a kouvri desanm 2024. Atak gang nan zòn metwopoliten Pòtoprens lan (ZMPP) ak nan Latibonit kontinye vin pi mal, sitou nan Site Solèy ak nan komin Ti Rivyè. Rekridesans vyolans gang depi novanm limite deplasman, redui posiblite revni menaj pòv yo epi deplase plis pase 21 400 moun pandan 17 premye jou desanm yo dapre OIM. Konsa rezilta Kriz (Faz 3 IPC) rete toupatou, ak yon Ijans (Faz 4 IPC) nan Site Solèy, pandan moun deplase nan sit abri ZMPP yo, ki nan kondisyon prekè, ak pòch menaj trè pòv nan Lwès, Nòdwès ak Grandans gen rezilta Ijans tou.

Vyolans lan te patikilyèman mòtèl: masak chèf gang yo rele Mikanor la mennen nan Wharf Jérémie, nan Site Solèy, touye omwen 207 moun ant 6 ak 11 desanm dapre BINUH epi, nan Ti Rivyè, apre yon operasyon konjwen Polis Nasyonal Ayiti a ak Misyon Miltinasyonal Sipò Sekirite a kont gang Gran Grif la, gang lan lanse atak 13 desanm epi touye 70 moun. Flanbe sa a domaje sous revni menaj pòv yo, deranje fonksyònman ak apwovizyònman mache yo epi anpeche distribisyon èd alimantè. Nan zòn ki pi ensekirize yo, sitou ZMPP ak Ti Rivyè, aksè menaj yo ak mache vin pi kontrent akoz baryè finansye, ladan yo enposiblite pou retire lajan kach nan bank ak kay transfè ki manke likidite, ak difikilte pou fè aktivite abityèl k ap jenere revni.

Inondasyon nan Nò, Nòdwès, Sid ak Grandans depi fen novanm ak kòmansman desanm domaje tè kiltive epi fè viktim, ladan yo 10 mò ak sis moun ki disparèt. Nan Grandans, 6 000 agrikiltè ak 500 elvè afekte dapre OCHA. Nan zòn ki pi frape nan Nò ak Nòdwès, plis pase 80 pousan jaden pwa, patat ak fig nan plèn yo detwi, ak kilti pwa ki patikilyèman frape nan Nòdwès. Plis pase 80 pousan kilti pwa kongo nan Grand Sid, ke yo rekòlte nòmalman soti fen novanm rive janvye, detwi, epi nan Grandans, sitou nan Ansdeno, Dam Mari ak Chanbelan, anviwon 75 pousan jaden plèn yo detwi.